Category: Uncategorized

Әзербайжан Президенті Илхам Әлиев Қазақстан Президенті Қасым-Жомарт Тоқаевпен жеке іс-қимылын екіжақты ынтымақтастық пен өңірлік жобаларды дамытудың маңызды факторы деп атады. Бұл туралы ол IV Шуша жаһандық медиафорумында «Qazcontent» АҚ басқарма төрағасы Әділ Сейфуллиннің сұрағына жауап бере отырып мәлімдеді.

13-14 шілдеде Шуша қаласында «Бейбітшілікті ілгерілетудегі медианың миссиясы: шындықты қалпына келтіру және сенімді нығайту» тақырыбында IV Шуша жаһандық медиафорумы өтіп жатыр.

Форумға 54 мемлекеттен бұқаралық ақпарат құралдарының, сарапшылар қауымдастығының, мемлекеттік органдар мен халықаралық ұйымдардың 160-қа жуық өкілі қатысуда. Қатысушылар арасында 30-ға жуық халықаралық ақпараттық агенттік пен 60-тан астам жетекші медиақұрылымдардың өкілдері бар.

Әзербайжан Президенті Илхам Әлиевтің қатысуымен өткен пленарлық отырыс форумның орталық оқиғаларының біріне айналды. Халықаралық бұқаралық ақпарат құралдарының өкілдеріне мемлекет басшысына сұрақ қою мүмкіндігі берілді.

Қазақстан атынан Әзербайжан Президентіне «Qazcontent» АҚ басқарма төрағасы Әділ Сейфуллин сауал жолдады. Ол Қазақстан мен Әзербайжан арасындағы екіжақты ынтымақтастықтың жоғары деңгейін, сондай-ақ екі елдің жаңа көліктік және экономикалық маршруттарды қалыптастырудағы рөлін атап өтті. Оның айтуынша, Орта дәліз ретінде белгілі Транскаспий халықаралық көлік маршруты Азия мен Еуропа арасындағы маңызды байланыстырушы буынға айналып үлгерді.

Әділ Сейфуллин Әзербайжан Президентінен Қазақстанмен стратегиялық серіктестікке, сондай-ақ екіжақты қарым-қатынастарды дамытуда Қасым-Жомарт Тоқаевпен жеке іс-қимылына қандай рөл бөлетінін сұрады.

Сұраққа жауап бере отырып, Илхам Әлиев ең алдымен Қазақстан Президенті мен қазақ халқына Қарабақты қалпына келтіруге көрсеткен көмегі үшін алғыс айтты. Ол Физули қаласында Қазақстанның қолдауымен қазақ композиторы Құрманғазының құрметіне аталған Балалар шығармашылығы орталығы салынғанын еске салды. Нысан екі ел президенттерінің қатысуымен ашылған болатын.

Мен Президент Тоқаевқа Қарабақты қалпына келтіруге көмектескені үшін өте ризамын. Физулидегі Балалар шығармашылығы орталығы қазақ халқының ұлы перзенті Құрманғазының есімін иеленген. Қасым-Жомарт Кемелұлымен бірге біз бұл орталықты ашқан едік, – деді Илхам Әлиев.

Әзербайжан Президенті екі мемлекет басшылары арасындағы жеке қарым-қатынастар қазақ-әзербайжан серіктестігін нығайтуға ықпал ететінін баса айтты.

Президент Тоқаевпен біздің жеке қарым-қатынасымыз екіжақты ынтымақтастық пен өңірлік өзара іс-қимылды дамытудың маңызды факторы болып табылады, – деп атап өтті ол.

Илхам Әлиевтің айтуынша, Қазақстан мен Әзербайжанның ауқымды бірлескен күн тәртібі бар. Екі мемлекеттің Каспий теңізінің қарама-қарсы жағалауында орналасу географиялық жағдайы олардың көлік, логистика және инфрақұрылымдық жобаларды жүзеге асырудағы негізгі рөлін айқындайды. Әзербайжан басшысы Қазақстан мен Әзербайжан арасындағы белсенді іс-қимылсыз Каспий өңіріндегі ірі көлік бастамаларын жүзеге асыру мүмкін емес екенін мәлімдеді.

Елдер Орта дәлізді дамытуға ерекше көңіл бөлуде. Қазақстан мен Әзербайжан маршруттың өткізу қабілетін арттыруға және Азия мен Еуропа арасындағы жүктерді жеткізу мерзімін қысқартуға тырысып, порттық және көліктік инфрақұрылымды дәйекті түрде кеңейтіп келеді.

Бұдан бөлек, Қазақстан, Әзербайжан, Грузия және Түркия ынтымақтастығының төртжақты форматы жұмыс істейді. Оның аясында тараптар тарифтік саясатты, көлік процестерін цифрландыруды, кедендік рәсімдерді жеңілдетуді және жүк тасымалының тиімділігін арттыруды талқылайды.

Илхам Әлиев бірлескен энергетикалық жобаларға да тоқталып өтті. Ол 2024 жылы Бакуде Қазақстан, Әзербайжан және Өзбекстан президенттері Каспий теңізінің түбімен энергетикалық кабель салу жобасы бойынша келісімге қол қойғанын еске салды. Қазіргі уақытта жобаның техникалық-экономикалық негіздемесі дайындалып жатыр.

Жаңа энергетикалық бағыт Орталық Азия мен Оңтүстік Кавказ мемлекеттерінің ынтымақтастығын кеңейтуге, сондай-ақ электр энергиясын сыртқы нарықтарға экспорттау үшін қосымша мүмкіндіктер жасауға мүмкіндік береді деп күтілуде.

Тағы бір маңызды бағыт – Каспий теңізінің түбі арқылы Қазақстан мен Әзербайжан арасында талшықты-оптикалық байланыс желісін салу.

Илхам Әлиевтің айтуынша, жоба тек екі мемлекет үшін ғана емес, сонымен бірге кеңірек аймақ үшін де маңызды болмақ. Жаңа инфрақұрылым цифрландыруды, деректерді өңдеуді, жасанды интеллектті және басқа да заманауи технологияларды дамыту үшін пайдаланылуы мүмкін.

Әзербайжан Президенті екі елдің мұнай-газ саласындағы ынтымақтастығын да атап өтті. Қазақстан мұнайы қазірдің өзінде Әзербайжан аумағы арқылы белгілі бір көлемде тасымалдануда, бұл экспорттық бағыттарды әртараптандыруға және аймақтық энергетикалық жүйенің тұрақтылығын арттыруға септігін тигізеді.

Қазақстанның дамуы туралы айта келе, Илхам Әлиев елде жүргізіліп жатқан өзгерістерді оң бағалап, қазақ халқына алдағы уақытта да табыс тіледі. Ол жақында Түркістанға жасаған сапарынан алған әсерлерімен бөлісті.

Мен ол жерде тарихи мұраның қаншалықты ұқыпты сақталып, ұлы бабалар рухының қастерленетініне үлкен әсер алдым, – деді Әзербайжан басшысы.

Илхам Әлиев екі ел арасындағы қарым-қатынастардың серпінді дамып келе жатқанына қуанышты екенін жеткізді.

Қазақстан мен Әзербайжан көлік, энергетика, цифрлық, сауда-экономикалық және мәдени-гуманитарлық салалардағы ынтымақтастықты кеңейтуді жалғастыруда. Бұл өзара іс-қимылдың басты факторларының бірі – жоғары деңгейдегі тұрақты саяси диалог.

IV Шуша жаһандық медиафорумы бұқаралық ақпарат құралдарына деген сенімді нығайту, дезинформацияға қарсы іс-қимыл, медианы цифрлық трансформациялау, жасанды интеллектіні қолдану және халықаралық ынтымақтастықты дамыту мәселелеріне арналған.

Форумға қатысушылар сондай-ақ бейбітшілікті ілгерілетудегі, сенімді қалпына келтірудегі және халықаралық оқиғаларды объективті жариялауды қамтамасыз етудегі журналистиканың рөлін талқылауда.

Дереккөз: Әзербайжан мемлекеттік ақпарат агенттігі

QAZCONTENT компаниясы жұмыс берушілердің әлеуметтік тұрақтылығын бағалайтын PARYZ BRIDGE ауқымды зерттеуінің қорытындысы бойынша «Ақпарат және байланыс» саласында 3-орынға ие болды.

Еліміздегі ең ірі зерттеулердің бірі саналатын PARYZ BRIDGE жобасы аясында Қазақстан бойынша 117 компания мен 150 мыңнан астам қызметкер қамтылды.

Әлеуметтік тұрақтылық индексі төрт тәуелсіз дереккөз негізінде қалыптастырылды: халық арасында жүргізілген әлеуметтік сауалнама, қызметкерлердің пікірі, HR-процестердің жетілу деңгейін бағалау және HR көрсеткіштерін объективті талдау.

Зерттеу нәтижесі бойынша «Ақпарат және байланыс» саласы жоғары тиімділікті көрсетті. Саладағы еңбек өнімділігі бір қызметкерге шаққанда 94,1 млн теңгені құраса, HR-процестердің жетілу деңгейі 77,2%-ға бағаланған. Бұл салада бизнес пен адами капиталды басқару жүйесінің тиімді қалыптасқанын айғақтайды.

QAZCONTENT үшін бұл нәтиже – қызметкерлерге қолайлы жұмыс ортасын қалыптастыру, олардың кәсіби дамуына жағдай жасау және еңбекке деген құрмет мәдениетін нығайту бағытындағы жүйелі жұмыстың жемісі.

«Jastar Research Hub» жас сарапшылар акселераторы аясында «QAZCONTENT» АҚ Басқарма төрағасының кеңесшісі Мөлдір Шыңғысқызы Кәрімова қатысушылармен кездесіп, «QAZCONTENT» қызметі, әлемдік медиа трендтер және еліміздің цифрлық медиасының даму бағыттары туралы баяндама жасады. Сонымен қатар, отандық медиакеңістікті дамытудағы жаңа бастамалар мен цифрлық трансформацияның негізгі үрдістеріне тоқталды.

«Астана Тазалық» ЖШС ұйымдастырған бұқаралық ақпарат құралдары өкілдері мен блогерлерге арналған «Таза Қазақстан – Таза Астана» шығармашылық байқауында «Qazcontent» АҚ құрамындағы BAQ.KZ ақпарат агенттігінің қызметкерлері жүлделі орындарға ие болды.

Байқау қорытындысы бойынша BAQ.KZ ақпарат агенттігінің тілшісі Аида Батухан «Әлеуметтік желідегі үздік жарияланым» номинациясында І орын иеленді. Ал BAQ.KZ ақпарат агенттігінің шығарушы редакторы Айым Сәдуақасова «Интернет-басылымдағы үздік жарияланым» номинациясында ІІ орынға лайық деп танылды.

Сондай-ақ Креативті контент дирекциясы әзірлеген деректі фильм байқауда үздік жұмыс ретінде бағаланып, арнайы марапатқа ие болды.

Аталған байқау бұқаралық ақпарат құралдары мен цифрлық платформаларда экологиялық мәдениетті қалыптастыруға, қоршаған ортаны қорғау мен тазалық құндылықтарын кеңінен насихаттауға бағытталған үздік журналистік және шығармашылық жұмыстарды анықтауды мақсат етті.

Журналистердің кәсіби мерекесі қарсаңында Президент Қасым-Жомарт Тоқаевтың атынан бұқаралық ақпарат құралдарының бір топ қызметкеріне баспана берілді.

«Dara» Президенттік бастамалар қорының ұйымдастыруымен өткен іс-шарада Президент кеңесшісі – Баспасөз хатшысы Айбек Смадияров медиа мамандарын мерекемен құттықтап, Мемлекет басшысының тапсырмасымен БАҚ қызметкерлеріне пәтер беру бастамасы биыл төртінші жыл қатарынан жүзеге асырылып жатқанын атап өтті.

“Бұл игі жобаның биылғы ерекшелігі – пәтерлер Астанада ғана емес, Алматыда, сонымен қатар еліміздің барлық облысында да берілетін болды. Мұндағы мақсат – өңірлік журналистиканы дамыту және әріптестерді әлеуметтік тұрғыда қолдау. Мереке қарсаңында облыстық ақпарат құралдарының қызметкерлері,  сондай-ақ республикалық БАҚ-тардың жергілікті тілшілері қоныс тойын тойлағалы жатыр. Тіпті орталықтан шалғай елді мекендер де назардан тыс қалған жоқ. Мысалы, бұл жолы Қостанай облысының Арқалық қаласында және Түркістан облысының Созақ ауданында тұратын әріптестеріміз үйлі болмақ”, – деді Айбек Смадияров.

Биыл БАҚ қызметкерлеріне 66 пәтер беріледі. Оның ішінде Астана қаласында – 15, Алматы қаласында – 15, қалған 18 аймақта 2 пәтерден бөлінді.

Айта кетейік, Президент атынан пәтер кілтіне ие болған БАҚ өкілдерінің бірі «Qazcontent» АҚ қызметкері, PrimeMinister.kz ақпарат агенттігінің аға операторы – Бағлан Бегайдаров.

Ол телевизия саласында және мемлекеттік медиада 13 жылдық тәжірибесі бар оператор-қоюшы әрі видеограф.

Қазіргі уақытта «Qazcontent» АҚ-да аға оператор қызметін атқарады. Ол Қазақстан Республикасы Премьер-министрінің жұмыс сапарларын, кездесулері мен кеңестерін, Үкімет отырыстарын, сұхбаттарды және PrimeMinister.kz порталына арналған бейнематериалдарды түсірумен айналысады.

Еңбек жолында Atameken Business, Gold Cinema Group және Zmedia компанияларында қызмет атқарған. Кәсіби еңбегі үшін Қазақстан Республикасы Премьер-министрінің Алғыс хаттарымен, сондай-ақ телевизия саласындағы бірқатар кәсіби марапаттармен марапатталған.

Баспанаға үміткерлерді анықтау, пәтерлерді даярлау жұмыстарын «Dara» Президенттік бастамаларды қолдау қоры, Президенттің Іс басқармасы, жергілікті атқарушы органдар мен БАҚ редакциялары бірлесе жүргізді.

Атап өтерлік жайт, өткен үш жылда Президент атынан БАҚ саласының 200 қызметкеріне баспана берілді.

Сондай-ақ бүгін Алматыда Мемлекет басшысының атынан отандық БАҚ қызметкерлері марапатталды. Салтанатты іс-шара барысында отандық журналистиканың дамуына қосқан үлесі үшін медиа саласының қызметкерлеріне «Парасат», «Құрмет» ордендері, «Ерен еңбегі үшін», «Шапағат» медальдары, сондай-ақ Қазақстан Республикасы Президентінің алғысы табысталды.

Бұқаралық ақпарат құралдары қызметкерлері күні қарсаңында Қазақстан Республикасының Президенті Қасым-Жомарт Тоқаев мемлекеттік наградаларды тапсырудың салтанатты рәсімін өткізді.

Өз сөзінде Мемлекет басшысы жиналғандарды кәсіби мерекелерімен құттықтап, олардың ел өміріндегі жоғары миссиясын атап өтті. Президент журналистердің ел үшін тағдырлы жаңа Конституцияны қабылдау үдерісіндегі ерекше рөлін айрықша атап, оларға объективті жарияланымдары мен белсенді азаматтық ұстанымдары үшін алғыс білдірді.

Қасым-Жомарт Тоқаев қазақстандық БАҚ әділдікпен халықтың дауысы әрі қоғамның айнасы деп аталуға лайық екенін жеткізді. Оның айтуынша, отандық журналистердің еңбегінің арқасында ғана қазақстандықтар мен бүкіл әлем қауымы елімізде жүргізіліп жатқан ауқымды өзгерістердің мәні жайлы нақты ақпарат алады.

Президенттік грантқа Baq.kz ақпараттық порталының тілшісі Олжас Адай ие болды. Ол отандық журналистиканы дамытуға қосқан елеулі үлесі мен жоғары кәсібилігі үшін Қазақстан Республикасы Президентінің бұқаралық ақпарат құралдары саласындағы грантына ие болды.

Рәсім ардагерлер мен медиа саласының жас өкілдерін біріктірген салтанатты түрде өтті. Президент БАҚ қызметкерлеріне шығармашылық табыс, жаңа кәсіби жетістіктер және таңдаған ісіне адалдық тілегін жолдады.

Бұқаралық ақпарат құралдары қызметкерлері күні қарсаңында, 2026 жылғы 20 маусымда к «Spaces» коворкинг кеңістігінде «QAZCONTENT OPEN 2026» шахмат турнирі ұйымдастырылды. Турнир Қазақстан шахмат федерациясы мен «Qazcontent» АҚ бастамасымен өткізіліп, «Zhanykulov Foundation» жеке қорының қолдауына ие болды.

Жарысқа қазақстандық бұқаралық ақпарат құралдарының 40-тан астам өкілі қатысты. Олардың қатарында баспасөз, телеарна, радио және интернет-басылым журналистері, сондай-ақ блогерлер болды. Турнир 7 турдан тұратын швейцариялық жүйе бойынша өткізіліп, нәтижелерді есептеу үшін «Swiss-Manager» компьютерлік бағдарламасы қолданылды. Жартылай финалдық және финалдық кезеңдер нокаут жүйесі бойынша ұйымдастырылды.

Турнир жеңімпаздары:
1-орын — Сағыныш Ансабаев, Қазмедиа орталығы
2-орын — Салықбаев Нұрлан, «Qazaqstan» телеарнасы
3-орын — Төрешов Жанболат, Қазмедиа орталығы

Сонымен қатар әйелдер арасындағы «Ең үздік ойыншы» ретінде «Qazaqstan» телеарнасының редакторы Ляззат Тушкенова марапатталды.

«QAZCONTENT OPEN 2026»  турнирінің «Ең үздік БАҚ өкілі» номинациясын «El.kz» ақпараттық-танымдық порталынының бас редакторының орынбасары Рустем Омаров иеленді.

«Qazcontent» шахмат турнирі жоғары деңгейде ұйымдастырылып, қатысушылардың үлкен қызығушылығын тудырғанын атап өткім келеді. Турнир барысында ойыншылар өздерінің зияткерлік әлеуетін, табандылығы мен шеберлігін көрсетті. Осындай игі бастамалар ұжымдық бірлікті нығайтып, шахмат мәдениетінің дамуына серпін береді деп сенемін»- деп түйіндеді “Qazcontent” АҚ Басқарма төрағасы Әділ Сейфуллин.

Қатысушылар қатарында «Хабар», «Qazsport» телеарналарының, «Tengrinews.kz», «Elordainfo.kz», «Литер», «Egemen Qazaqstan» және еліміздің басқа да жетекші бұқаралық ақпарат құралдарының өкілдері болды. Турнир спорттық жарыс қана емес, сонымен қатар кәсіби қарым-қатынас орнатуға, пікір алмасуға және достық атмосферада бас қосуға мүмкіндік берген зияткерлік алаңға айналды.

Турнир қорытындысы бойынша жеңімпаздар мен жүлдегерлер дипломдармен және ақшалай сертификаттармен марапатталды. Қатысушылар іс-шараның жоғары деңгейде ұйымдастырылғанын атап өтіп, ұйымдастырушыларға жылы қабылдау мен еркін қарым-қатынас жасауға мүмкіндік берген жайлы атмосфера үшін алғыстарын білдірді.

Турнир қорытындыларымен келесі сілтеме арқылы танысуға болады:

https://s3.chess-results.com/tnr1441428.aspx?lan=1&art=1&rd=7&SNode=S0

Бұқаралық ақпарат құралдары қызметкерлері күніне орай Қазақстан шахмат федерациясы және «Qazcontent» АҚ  бірлесе отырып «QAZCONTENT OPEN 2026» шахмат турнирін ұйымдастырады.

Турнир 2026 жылдың 20 маусымында Астана қаласындағы Spaces коворкингінде (Самал шағын ауданы, 11) өтеді.

Қатысушыларды тіркеу сағат 09:00-де басталады.

QAZCONTENT OPEN 2026 турнирі швейцариялық жүйе бойынша 7 турдан тұратын блиц форматында өткізіледі. Жартылай финал – нокаут жүйесінде өтеді. Қатысуға теледидар, баспа, радио, интернет БАҚ қызметкерлері, сондай-ақ блогерлер мен инфлюенсерлер шақырылады.

Жеңімпаздарға дипломдар, бағалы сыйлықтар және жүлде қоры табысталады.

•  1-орын — 500 000 теңге
•  2-орын — 200 000 теңге
•  3-орын — 100 000 теңге

Барлық нәтиже халықаралық Chess-Results.com платформасында жарияланады.

Қатысу үшін келесі сілтеме арқылы тіркелу қажет:
https://arshat.kz/chess.html

Тіркеу 2026 жылғы 18 маусым күні сағат 18:00-де аяқталады.
Турнирге ФИДЕ блиц-рейтингі 2000-нан аспайтын, кәсіби шахматшы немесе жаттықтырушы болып табылмайтын тұлғалар ғана қатыса алады.

Құрметті БАҚ және медиа өкілдері, сіздерді турнирде асыға күтеміз!

Зияткерлік демалысты әріптестеріңізбен бірге өткізіңіз!

Әділ Сейфуллин 2017 жылы Л.Н. Гумилев атындағы ЕҰУ-ды «Журналистика» мамандығы бойынша бітірген. 2019 жылы әлеуметтік ғылымдар магистрі дәрежесін алды.

Еңбек жолын медиа және коммуникация саласында бастады. Президенттік жастар кадр резервінің мүшесі. 2026 жылғы ақпаннан бастап Қазақстан Республикасының мәдениет және ақпарат министрінің кеңесшісі қызметін атқарды. «Хабар» агенттігі Басқарма төрағасының кеңесшісі, сондай-ақ «ҚазАқпарат» халықаралық ақпараттық агенттігінде жобаларды дамыту департаментінің директорының орынбасары болып жұмыс істеді.

Кәсіби қызметі жолында журналистика, телевизия және цифрлық коммуникациялар саласында бірқатар табысты жобады жүзеге асырды.

Елордада өткен OQY BOOK FEST фестивалі қаланың әдеби өміріндегі ең жарқын мәдени шаралардың бірі ретінде өз мәресіне жетті. Биыл ұйымдастырушылар дәстүрлі кітап жәрмеңкесінен бөлек, интерактивті форматқа ерекше назар аударды. Соның арқасында кітап мәдениеті авторлар мен оқырмандар арасындағы ашық диалогқа, кітап алмасуға және цифрлық әдеби жобаларды таныстыруға ұласты.

Фестивальдің ең көп қызығушылық тудырған аймақтарының бірі- буккроссинг алаңы болды. Мұнда әрбір қонақ өзімен бірге әкелген кітабын басқа кітапқа тегін айырбастай алды. Ұйымдастырушылардың айтуынша, шара барысында жүздеген кітап оқырманнан оқырманға өтіп, ерекше «тірі кітап тізбегін» қалыптастырды.

Келушілер үшін маңызды жаңалықтардың бірі ADEBIPORTAL.KZ цифрлық платформасының таныстырылымы болды. Бұл онлайн кітапханада қазақ әдебиетінің мыңдаған электронды және аудиокітаптары жинақталған. Қонақтар шығармаларды оқып қана қоймай, қазақ тіліндегі аудионұсқаларды тыңдап, заманауи авторлардың сұхбаттары мен жеке парақшаларымен танысу мүмкіндігіне ие болды.

Фестиваль аясында Президент Қасым-Жомарт Тоқаевтың бастамасымен жүзеге асып жатқан «Ұлт оқитын 100 кітап» жобасына арналған арнайы бөлім де жұмыс істеді. Аталған тізім жалпыұлттық сауалнама негізінде іріктелген туындылардан құралған. Жобаның негізгі мақсаты — қоғамда кітап оқу мәдениетін дамыту және ұлттық әдеби мұраны кеңінен насихаттау.

Шараның түрлі алаңдарында фэнтези, ғылыми фантастика, заманауи проза және жасөспірімдер әдебиеті бағытында қалам тербеп жүрген авторлар оқырмандармен кездесті. Олардың қатарында Вилл Нокс, Дана Найдер, Артем Уразимбетов, Мая Сара және өзге де жазушылар болды. Қаламгерлер жаңа туындыларын таныстырып, шығармашылық жолдары туралы әңгімелеп, оқырмандар қойған сұрақтарға жауап берді.