«Qazcontent» акционерлік қоғамы мемлекеттік тапсырманы орындауға көрсетілетін ілеспе қызметтер бойынша шарттар жасасу мақсатында әлеуетті өнім берушілерден өтінімдер қабылдайды

Мекенжайы: Астана қаласы, Қабанбай батыр даңғылы, 17, «Qazcontent» АҚ кеңсесі

Телефоны: +7 7172 95-40-50

E-mail: info@qcontent.kz

Өтінімді қабылдау күні: 2023 жылғы 25 желтоқсан 18:00-ге дейін

Әлеуетті өнім берушілерге қойылатын жалпы талаптар:

  • республикалық бюджет туралы заңда тиісті қаржы жылына белгіленген айлық есептік көрсеткіштің алты еселенген мөлшерінен асатын салық берешегінің болмауы;
  • банкроттық немесе тарату рәсіміне қатысы жоқ;
  • материалдық-техникалық (қажет болған жағдайда меншік құқығын растайтын құжаттарды қоса беру, жалға алған жағдайда жалдау шартын және жалға берушінің меншік құқығын растайтын құжаттарды қоса беру) және еңбек ресурстары (оның ішінде, қажет болған жағдайда шарт бойынша міндеттемелерді орындау үшін жалдау шарты немесе өтеулі қызметтер көрсетуге арналған шарт ұсынылуы тиіс) болуы тиіс;
  • құрылтай құжаттарын ұсыну (Жарғының көшірмесі, тіркелген заңды тұлға, филиал немесе өкілдік туралы анықтама, банктік деректемелер, ҚҚС қою туралы куәліктің көшірмесі (бар болса));
  • қызметтердің құнын негіздейтін сметаның, калькуляцияның болуы;
  • әлеуетті өнім берушінің толтырылған және қол қойылған сауалнамасын ұсыну

Ұсынылатын құжаттарда заңнамада көзделген барлық қажетті қолы қойылуы, күндері, мөртаңбалар мен мөрлер болуы тиіс, сондай-ақ тазартулар, түзетулер болмауы тиіс және дұрыстығына күмән келтірмеуі тиіс. Барлық құжаттар ұсынылған күні жарамды болуы керек.

Қызметтер атауы Қызметтер сипаттамасы Әлеуетті өнім берушілерге қойылатын негізгі талаптар
Қоғамның  e-history.kz, adebiportal.kz, baq.kz, baigenews.kz, el.kz, primeminister.kz, ruh.kz интернет-ресурстарын техникалық сүйемелдеу Сайттың жұмысына мониторинг және техникалық қолдау көрсету, сайттың функционалдық мүмкіндіктерін оңтайландыру, Тапсырыс берушінің талаптары мен техникалық орындалушылығын ескере отырып, проблемаларды жедел шешу.

Дерекқордың және сайттың бағдарламалық бөлігінің резервтік көшірмесі.

Сайттың жауап беретін нұсқасының жұмыс істеуін қамтамасыз ету.

Қоғам порталдарының жұмыс қабілеттілігін қамтамасыз ету және олардың функционалдығын дамыту, сондай-ақ дизайнерлік безендіруді әзірлеуді қамтамасыз ету, сайтта орналастырылған материалдарды түзету (қажет болған жағдайда), баннерлер құру, функционалдық бөлігін пысықтау.

Өнім беруші порталдың үздіксіз жұмысын қамтамасыз етуге, проблемалар туындаған кезде оларды бір тәулік ішінде жоюға, кодтың өзектілігін және порталдың ақпараттық қауіпсіздігін бақылауға міндетті.

Жаңалықтар сайттарды кемінде үш жыл жұмыс тәжірибесін, тақырыптық сайттарды кемінде екі жыл жұмыс тәжірибесін техникалық сүйемелдеу саласында растайтын құжаттардың (шарттардың, актілердің) болуы.

Осы компанияда кемінде бес жыл жұмыс өтілі бар менеджмент саласында кемінде бір маманның болуы.

Осы компанияда кемінде бес жыл жұмыс өтілі бар кемінде бір бэкенд-әзірлеушінің * болуы;

Осы компанияда кемінде бес жыл жұмыс өтілі бар кемінде бір  фронтенд-әзірлеушінің * болуы;

Осы компанияда кемінде бес жыл жұмыс өтілі бар кемінде екі жүйелік әкімшінің** болуы;

Осы компанияда кемінде бес жыл жұмыс өтілі бар кемінде бір тестілеушінің болуы;

Осы компанияда кемінде бес жыл жұмыс өтілі бар кемінде бір веб-дизайнердің болуы.

*Мамандар тек ағымдағы портал үшін жұмысқа тартылуы тиіс. Ағымдағы порталға бекітілген мамандардың басқа да жобаларға жұмыс істеуіне жол берілмейді.

** Қоғамның primeminister.kz интернет-ресурсы үшін  басқа жобаларға қатысы жоқ кем дегенде бір жүйелік әкімші.

ИР дамыған және әзірленген жағдайда Қазақстан Республикасы стандарттарының талаптарын басшылыққа алу:

•  ҚР СТ 2190-2012 “Ақпараттық технологиялар. Мемлекеттік органдар мен ұйымдардың интернет-ресурстары. Талаптар”,

·  ҚР СТ 2191-2012 “Ақпараттық технологиялар. Мүмкіндігі шектеулі жандар үшін интернет-ресурстың қолжетімділігі”,

·  ҚР СТ 2192-2012 “Ақпараттық технологиялар. Интернет-ресурс, интернет-портал, интранет-портал. Жалпы сипаттамалар”,

·  ҚР СТ 2193-2012 “Ақпараттық технологиялар. Мобильді веб-қосымшаларды әзірлеудің ұсынылатын тәжірибесі”,

·  ҚР СТ 2199-2012 “Ақпараттық технологиялар. Мемлекеттік органдарда веб-қосымшалардың қауіпсіздігіне қойылатын талаптар”.

El.kz ақпарат агенттігінің тілшісі «Үркер-2023» сыйлығын жеңіп алды

«Үркер-2023» баспа, радио, интернет-журналистика саласындағы ұлттық сыйлықтың он екі номинациясы бойынша жеңімпаздардың есімдері белгілі болды. El.kz тілшісі Амангүл Тілей «Әлеуметтік тақырыптағы үздік материал» номинациясының жеңімпазы атанды, деп хабарлайды El.kz ақпарат агенттігі. 

Жыл сайынғы ұлттық «Үркер» сыйлығы қазақстандық журналистер қауымдастығы үшін басты сыйлықтардың бірі. Биыл байқау 12 номинация бойынша өткізілуде, оның ішінде медиа саласын дамытуға үлесін қосып жүрген медиа мамандары үшін үш жаңа номинация қосылды. Атап айтқанда, «Үздік халықаралық БАҚ», «Үздік подкаст», «Үздік YouTube каналы».

El.kz ақпарат агенттігінің тілшісі «Үркер-2023» сыйлығын жеңіп алды

Байқауға баспа, радио, интернет-журналистика саласында қызмет етіп жүрген журналистерден барлығы 450 өтінім, солардың ішінде ең көбі «Әлеуметтік тақырыптағы үздік материал», «Жылдың үздік сұхбаты», «Үздік өңірлік БАҚ», «Жылдың үздік аналитикалық материалы» және «Жылдың үздік репортажы» номинациялары бойынша келіп түсті. Үздік жұмыстардың құрамын беделді журналистер, медиа менеджерлер бар қазылар алқасы анықтады.
Журналистика саласындағы «Үркер-2023» жыл сайынғы жүлдесін марапаттау рәсімі Астанадағы «Қазмедиа» орталығында өтті.
Амангүл Тілейге мүсін мен бір миллион теңге табыс етілді.

«Qazcontent» АҚ қызметкерлеріне пәтер кілті табысталды

«Qazcontent» АҚ-да еңбек етіп жүрген үш қызметкерге пәтер кілті табысталды, деп хабарлайды BAQ.KZ тілшісі.

Еске сала кетсек, БАҚ қызметкерлері күні қарсаңында «Qazcontent» АҚ қызметкерлеріне пәтер сертификаттары берілген болатын.

Мемлекет басшысының тапсырмасы бойынша жүзеге асқан игі іс «Дара» президенттік бастамалар қорының және «Халық» қайырымдылық қорының демеушілігімен жүзеге асқан еді. «Qazcontent» АҚ қызметкерлеріне пәтер кілтін Президенттің баспасөз хатшысы Руслан Желдібай тапсырды. BAQ.KZ ақпарат агенттігінің бас редакторы Мөлдір Бекбергеноваға 2 бөлмелі, Бауыржан Жуасбаевқа 1 бөлмелі пәтер, дизайнер Яна Смоляроваға 1 бөлмелі пәтер сертификаттары берілді.

BAQ.KZ ақпарат агенттігінің бас редакторы Мөлдір Бекбергенова құжат пен кілтті берсе де, сене алмай жатқанын айтады.

Қазіргі таңда үйді көруге бара жатырмыз. БАҚ күні қарсаңында ұзақ жылғы еңбегімізді бағалап, осынша құрмет көрсеткеніне алғысым шексіз, – деді Мөлдір Бекбергенова.

Тағы бір пәтер иесі «Qazcontent» дизайнері Яна Смолярова өз әсерімен бөлісті.

Әрине, бірден үйге барғым келеді. Бірақ қазір жұмыс істеп отырмын. Ойымның бәрі пәтерде, үйге өз аяғыммен барып кіруге асықпын, – деді ол.

Сондай-ақ «Qazcontent» АҚ Мәжілістің «Парламент сөзі» жүлдесін иемденді. Онымен қоса Трансфузиология ғылыми-өндірістік орталығында қазконтенттіктер қан тапсырған болатын. Астананың 25 жылдық мерейтойына ұйымдастырылған сайыста Qazcontent қызметкері үздік мобилограф атанған еді. 

Айта кеткен жөн, «Qazcontent» АҚ – мемлекеттік ақпараттық саясатты іске асыратын медиа компания. Бүгінгі таңда компания алты ақпараттық ресурстарды біріктіреді. Бұл жаңалықтар сайттары – baigenews.kz, baq.kz және el.kz, тақырыптық порталдар – adebiportal.kz және e-history.kz, сондай-ақ Қазақстан Республикасы Премьер-Министрінің ресми сайты.

Компания ресурстары үш тілде қол жетімді: қазақ, орыс және ағылшын тілдерінде.

«RUH.KZ» ақпараттық-танымдық порталының Бас редакторы тағайындалды

«RUH.KZ» ақпараттық-танымдық порталының Бас редакторы қызметіне Қазақстан Жазушылар одағының мүшесі, «Дарын» мемлекеттік жастар сыйлығының лауреаты, ақын Арман Шеризат тағайындалды.

Ол бұған дейін «Әдебиет порталы» интернет-жобасында, республикалық «Егемен Қазақстан» газетінде тілшілік қызметтер атқарып, мол тәжірибе жинақтаған маман. Журналистік жолда әдеби, танымдық мақалалары мен «Бір суреттің тарихы» видеосұхбаты, «Еркін сөз» аудиоподкасты арқылы көзге түсті. Әдебиеттегі қадамын өлеңнен бастап жастай шығармашылық жолды таңдаған азамат бүгінде «Тәңірқұт», «Күміс шық» атты қос бірдей жыр жинақтың авторы.

«Ruh.kz» ақпараттық-танымдық сайты  2017 жылдың қыркүйек айында құрылып, «Рухани жаңғыру» қазақстандық қоғамдық даму институтына 2020 жылғы 4 мамырда берілді.

Портал жұмысының негізгі мақсаты – идеологиялық құндылықтарды насихаттау.

Сайт контенті интеллектуалды, мәдени және рухани бағыттағы тақырыптарды қамтитын материалдардан тұрады. Жарияланатын материалдардың негізгі форматы – елдің тарихи-мәдени дамуына ерекше үлес қосқан көрнекті қайраткерлер мақалалар, фоторепортаждар, бейне бағдарламалар мен инфографикалар. Жанрлары: жаңалықтар, мақалалар, сұхбаттар және т.б. Сонымен қатар, сайтта танымдық авторлық мақалалар, жастар, экология, ғылым, технологиялар, волонтерлік және жастардың әлеуетін дамытуға, оларды бәсекеге қабілеттілік пен патриотизмге бағыттайтын материалдар жарияланады.

2020 жылы сайтты жаңарту және оның функцияларын жетілдіру бойынша ауқымды жұмыс жүргізілді, контент ескі нұсқадан сайттың жаңа платформасына толығымен көшірілді, жаңа бөлімдер құрылды. Қазіргі уақытта осы бағыттағы жұмыстар жалғасуда.