Month: July 2023

Бүгін «Qazcontent» АҚ пен Мемлекет тарихы институты екі жақты қарым–қатынасты нығайту мақсатында меморандумға қол қойды. «Qazcontent» АҚ тарапынан Басқарма төрағасы Бекзат Жүсіпов, екінші тараптан Мемлекет тарихы институтының директоры Нұрбек Пұсырманов қол қойды.

Мақсат – ұлттық тарихты электронды форматта насихаттап келе жатқан Qazaqstan tarihy интернет-жобасының аудитория кеңістігін арттырып, порталды тарих мәселелері жайындағы орталық ХАБ-қа айналдыру, сондай-ақ қызметкерлердің кәсіби дағдыларын арттыру, ақпараттық, әдістемелік саладағы ынтымақтастықты қамтамасыз ету мәселелері қарастырылған.

«Qazcontent» АҚ Басқарма төрағасы Бекзат Жүсіпов төл тарихымызды, әдебиетімізді қоғамға қарасты сайттарында тұрақты насихаттап келе жатқанын тілге тиек етті. Сонымен бірге жас тарихшы ғалымдарға қолдау көрсетіп, олардың мақала, зерттеу еңбектерін портал бетінде жариялауға мүмкіндік туып отырғандығын атап өтті.

«Qazaqstan tarihy» порталы ресми түрде 2013 жылы 25 қыркүйегінде құрылған. Портал «Qazcontent» АҚ-ның заманауи, цифрлы, гуманитарлық интернет-өнімі. Қазіргі интернет кеңістікте біздің елімізге, оның мәдениеті мен тарихына деген тұрақты қызығушылық қалыптасқан. Сондықтан портал шетелдік азаматтар мен қазақстандықтарға қазақ тарихын, мәдениеті мен дәстүрлерін, әдебиетін жан-жақты насихаттап келеді.  Сайт контенті қазақ, орыс, ағылшын тілдерінде ұсынылған. Мақала авторлары – порталдың журналистері және белгілі тарихшылар, ғалымдар, мұрағатшылар, археологтар және тарих саласының басқа да мамандары.

Өз кезегінде Мемлекет тарихы институтының директоры Нұрбек Пұсырманов портал ел тарихын насихаттауда басты ақпараттық құрылым болып отырғандығын атап өтті. Сондай-ақ тарих және мәдениет саласындағы ұйымдар мен институттардың e-history.kz порталымен бірлесе жұмыс істеуі маңызды екенін айтты.

«Қазақстан тарихы» порталы сенімді дереккөз ретінде цифрлық тарихи материалды, тарихи мәселелерді,  энциклопедиялық анықтамалықты ұсыну және ұлттық тарих пен мәдениетті танымал ету бойынша еліміздегі негізгі ақпараттық арна болып отыр. Шынында да еліміздегі тарихқа қатысты барлық мәселелерді бір жерге шоғырландыру, ұлттық тарихымызды дұрыс насихаттау сіз бен біздің басты міндеміз.  Қазір білесіздер тарихты кез-келген адам айтатын болды. Сондықтан негізгі шынайы ақпараттық, ғылыми зерттеулерді біз айтып, оны e-history.kz сияқты бір медиаға жинақтауымыз күн тәртібінің басты мәселесі. Ол жұмыстарды жасауда еліміздегі тарих және мәдениет саласындағы жетекші институттарын, ЖОО бірлесуге шақырамын» – деді Мемлекет тарихы институтының басшысы.

Меморандум аясында Qazaqstan tarihy мен Мемлекет тарихы институты бірлескен медиа жобаларды жүзеге асырмақшы.

Астананың 25 жылдық мерейтойына орай республикалық БАҚ өкілдері арасында өткен байқаудың жеңімпаздары марапатталды, деп хабарлайды BAQ.KZ.

БАҚ өкілдеріне арналған байқауда 7 аталым бойынша барлығы 100-ден астам үміткер сынға түсті. Жеңімпаздарды еліміздегі белгілі журналистер, медиа-сарапшылар және белгілі сала өкілдерінен құралған конкурстық комиссия анықтады.

Қазылар алқасының шешімімен мынадай аталымдар бойынша байқау жеңімпаздары анықталды:

«Үздік журналист-сарапшы» – 1-орын – Гүлшат Сералы («Астана ақшамы» газеті), 2-орын – Арнұр Асқар («Егемен Қазақстан» газеті), 3-орын – Максим Удод («Вечерняя Астана» газеті);

«Үздік шолушы» – 1-орын – Назира Балташева («Голос народа» ақпараттық агенттігі), 2-орын – Әбубәкір Смайылов («Жас қазақ» порталы), 3-орын – Әйгерім Мұсатаева («Литер» газеті);

«Үздік радиорепортаж» – 1-орын – Дулат Абибуллаев («Қазақ радиосы»), 2-орын – Раушан Сыбанжанова («Халық радиосы»), 3-орын – Азамат Тілепов («Қазақ радиосы»);

«Үздік телесюжет» – 1-орын – Марк Брюшко («Жібек жолы» телеарнасы), 2-орын – Ғабит Бөкенбай («Қазақстан» телеарнасы), 3-орын – Динара Абдирова («24 kz» телеарнасы);

«Үздік мобилограф» – 1-орын – Ұлан Әбішев («Қазконтент» АҚ), 2-орын – Әйгерім Ержанова («Евразия» бірінші арнасы), 3-орын – Абай Уахит («Аманат» партиясы);

«Үздік фоторепортаж» – 1-орын – Шүкір Шахай, 2-орын – Владислав Воднев, 3-орын – Сұлтан Сейітов («Астана ақшамы» газеті), Ерлан Омаров («Егемен Қазақстан» газеті);

«Әлеуметтік желідегі Астананың 25 жылдығы туралы үздік материал» арнайы номинациясы – 1-орын – Қайнар Олжай, 2-орын – Ренат Ташкинбаев, 3-орын – Салтанат Жакупова («Елорда Инфо» сайты).

Бірінші орынға – 1 000 000 теңге, екінші орынға – 500 мың теңге, үшінші орынға – 300 мың теңгенің сертификаты табыс етілді.

Айта кетейік, байқау Астана қаласы әкімдігінің тікелей қолдауымен ұйымдастырылды.

«Qazcontent» АҚ қызметкерлері Трансфузиология ғылыми-өндірістік орталығына донор болды, деп хабарлайды BAQ.KZ тілшісі.

«Qazcontent» АҚ басқарма төрағасы Бекзат Жүсіповтың тапсырмасымен ұйымдастырылған акция аясында қан орталығынан құрылған топ арнайы компания ғимаратына келіп, қызметкерлерден қан алды.

Қан орталығына хабарласып, «компания қызметкерлері донор болғысы келеді» деп айтуға болады. Егер қан тапсыратын адам саны 25-тен асса, мамандар тобы қажетті құрылғылары мен жабдықтарын түгендеп, сіздің жұмыс орыныңызға келеді. Бүгін бұл акцияны бірінші рет жасап тұрмыз. Қан тапсыруды екі айда бір ұйымдастырып тұруға болатын сауапты іс деп санаймын, – деді ұйымдастырушы Нұртай Башенов.

Қан тапсыруға ниетті қызметкерлер алдымен анкета толтырып, қан талдауынан өтті. Кейіннен талдау мен анкета нәтижелерімен терапевтке қаралды. Донор болу талаптарына сай адамдардан ғана қан алынды.

Бұрын гемоглабинім төмен болып, учетта тұратынмын. Соңғы екі жылда гемоглабинім қалпына келіп, бүгін бірінші рет донор болдым. Менің қаным біреуге көмегін тигізіп жатса, әрине, қуанамын, – деді «Qazcontent» АҚ қызметкері Майра Мырзатхан.

Айта кетейік, Қазақстан Республикасының 2020 жылғы 7 шілдедегі «Халық денсаулығы және денсаулық сақтау жүйесі туралы» кодексіне сәйкес, өтеусіз донациялаудан өткен адамға орташа жалақысы сақтала отырып бір демалыс күн беріледі. Сондай-ақ донорлық функция жұмыс күні орындалса, қызметкер сол күні жұмыстан босатылады немесе жұмыста қалып, екі демалыс күнді еңбек демалысына қосып ала алады.